==========

នៅព្រឹក​ថ្ងៃព្រហស្បតិ៍ ៨កើត​ ខែ​អស្សុជ​ ឆ្នាំ​រោង​ ឆស័ក​ ពុទ្ធសករាជ ២៥៦៨​ ត្រូវនឹងថ្ងៃទី​១០ ខែតុលា ឆ្នាំ​២០២៤នេះ​ ឯកឧត្តម​ សុត​ រស្មី​ រដ្ឋលេខាធិការ​ តំណាង​ដ៏ខ្ពង់ខ្ពស់​របស់ឯកឧត្តម​ ថោ ជេដ្ឋា​ រដ្ឋមន្ត្រី​ក្រសួង​ធនធានទឹក និង​ឧតុនិយម​ បានដឹកនាំគណៈប្រតិភូក្រសួង​​ចូលរួមគោរពវិញ្ញាណក្ខន្ធសពនាយឧត្តមសេនីយ៍ សែម សុវណ្ណនី អនុប្រធានទី១ គណៈកម្មាធិការជាតិសម្របសម្រួលកិច្ចការបញ្ជូនកងកម្លាំងចូលរួមបេសកកម្មថែរក្សាសន្តិភាពរបស់អង្គការសហប្រជាជាតិ និងជាអគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម ដែលបានទទួលមរណភាពកាលពីល្ងាចថ្ងៃទី៨ ខែតុលា ឆ្នាំ២០២៤ ក្នុងជន្មាយុ៦៥ឆ្នាំ ដោយរោគាពាធ នៅគេហដ្ឋាននៃសព ក្នុង​សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

ក្នុងឱកាសដ៏ក្រៀមក្រំនេះ​ ក្នុងនាម​ថ្នាក់ដឹកនាំ និង​មន្ត្រីរាជការទាំងអស់នៃក្រសួងធនធានទឹក និង​ឧតុនិយម​សូម​សម្ដែងនូវសមានទុក្ខ​ពោរពេញដោយទឹកចិត្ត​ក្តុកក្តួល សោកសៅ និងស្តាយស្រណោះអាឡោះអាល័យជាទីបំផុត ដោយបានចាត់ទុកការបាត់បង់នេះជាការបាត់បង់នូវឧត្តមស្វាមី ឪពុក ឪពុកក្មេក និង​ជីតាជាទីគោរពស្រលាញ់បំផុតប្រកបដោយព្រហ្មវិហារធម៌ និងគុណធម៌​ ហើយ​ជាការបាត់បង់នូវឥស្សរជនដ៏ឆ្នើមមួយរូបនៃកងយោធពលខេមរភូមិន្ទ ដែលបានខិតខំតស៊ូគ្រប់បែបយ៉ាងប្រកបដោយឆន្ទៈដ៏មោះមុត​ ក្នុងបុព្វហេតុបម្រើ​ជាតិ សាសនា ព្រះមហាក្សត្រ និងបានចូលរួម​លើកកម្ពស់មុខមាត់ប្រទេសកម្ពុជា ក៏ដូចជាកងយោធពលខេមរភូមិន្ទលើឆាកអន្តរជាតិ តាមរយៈការសម្របសម្រួល​ និង​ការដឹកនាំបេសកកម្មថែរក្សាសន្តិភាព បោសសម្អាតមីន និងកាកសំណល់សង្គ្រាម ក្រោមឆ័ត្រ​អង្គការសហប្រជាតិនៅតាម​បណ្តាប្រទេសមួយចំនួន​នៅលើពិភពលោក​។

យើងខ្ញុំទាំងអស់គ្នា​ សូមបួងសួងដល់គុណបុណ្យព្រះរតនត្រ័យកែវទាំងបី បារមីនៃវត្ថុស័ក្តិសិទ្ធិក្នុងលោកសូមជួយទ្រទ្រង់ដល់ដួងវិញ្ញាណក្ខន្ធ ឯកឧត្តម នាយឧត្តមសេនីយ៍ សែម សុវណ្ណនី បានទៅចាប់បដិសន្ធិ​ក្នុង​សុគតិភព​កុំបីឃ្លៀងឃ្លាតឡើយ៕