================

ថ្ងៃព្រហស្បតិ៍ ៥រោច ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៩ ខែកុម្ភៈ ឆ្នាំ២០២៤ នៅសាលប្រជុំរំដួល នៃទីស្តីការក្រសួង​ ឯកឧត្តម ប៊ុន ហ៊ាន រដ្ឋលេខាធិការ​ក្រសួងធនធានទឹក និងឧតុនិយម​បានអញ្ជើញជាអធិបតីដឹកនាំកិច្ចប្រជុំលើកទី៧ របស់អនុគណៈកម្មការរៀបចំតាក់តែង និង​ធ្វើបច្ចុប្បន្នកម្មគោលនយោបាយ ផែនការយុទ្ធសាស្ត្រ​ ផែនការសកម្មភាពពាក់ព័ន្ធនឹងវិស័យធនធានទឹក និង​ឧតុនិយម។

សូមជម្រាបថា កិច្ចប្រជុំលើកទី៧ នេះ​ មានការចូលរួមពីឯកឧត្តមអគ្គនាយកកិច្ចការរដ្ឋបាល ទីប្រឹក្សា​ក្រសួង ប្រធាននាយកដ្ឋាន និងមន្ត្រីដែលជាសមាជិកអនុគណៈកម្មការ យោងតាមអនុសាសន៍​ដ៏ខ្ពង់ខ្ពស់​របស់ឯកឧត្តមរដ្ឋមន្ត្រី​ក្នុងកិច្ចប្រជុំស្តីពីការរៀបចំផែនការយុទ្ធសាស្ត្រអភិវឌ្ឍន៍ជាតិ ៥ឆ្នាំ២០២៤-២០២៨ លើវិស័យធនធានទឹក និងឧតុនិយម កាលពីថ្ងៃទី២១ ខែកុម្ភៈ ឆ្នាំ២០២៤។

ឯកឧត្តមរដ្ឋលេខាធិការបានឱ្យដឹងថា កិច្ចប្រជុំបានពិភាក្សាលើផែនការយុទ្ធសាស្ត្រអភិវឌ្ឍន៍​លើវិស័យ​ធន​ធាន​ទឹក និងឧតុនិយម រយៈពេល ៥ឆ្នាំ២០២៤-២០២៨ ដោយបានបែងចែកជា ៤ជំពូក៖ ជំពូកទី១៖ សមិទ្ធផលស្តីពីការអនុវត្តផែនការយុទ្ធសាស្ត្រអភិវឌ្ឍន៍លើវិស័យធនធានទឹក និងឧតុនិយម​ រយៈពេល ៥ឆ្នាំ ២០១៩-២០២៣ ជំពូកទី២៖ ផែនការយុទ្ធសាស្ត្រអភិវឌ្ឍន៍លើវិស័យធនធានទឹក និងឧតុនិយម រយៈពេល ៥ឆ្នាំ​២០២៤-២០២៨ ជំពូកទី៣៖ ការតាមដានត្រួតពិនិត្យ និងវាយតម្លៃ ការអនុវត្តផែនការ​យុទ្ធសាស្ត្រអភិវឌ្ឍន៍លើវិស័យធនធានទឹក និងឧតុនិយម រយៈពេល ៥ឆ្នាំ២០២៤-២០២៨ ជំពូកទី៤៖ សេចក្តីសន្និដ្ឋាន និងអនុសាសន៍សម្រាប់ផែនការយុទ្ធសាស្ត្រអភិវឌ្ឍន៍លើវិស័យធនធានទឹក​​និង​ឧតុនិយម រយៈពេល ៥ឆ្នាំ២០២៤-២០២៨។

ជាមួយគ្នានេះដែរ ឯកឧត្តមរដ្ឋលេខាធិការបានបញ្ជាក់ថា ក្នុងកិច្ចប្រជុំដ៏មានសារៈសំខាន់នេះ​អង្គប្រជុំ​បាន​ពិភាក្សាគ្នាយ៉ាងលម្អិតអំពីសេចក្តីព្រាងនេះ នូវទិន្នន័យ មាតិកា អត្ថន័យ អក្ខរាវិរុទ្ធ ការប្រើប្រាស់ពាក្យ មាន​ការកែតម្រូវទៅលើខ្លឹមសារ ដើម្បីឱ្យបានច្បាស់លាស់ មានលក្ខណៈគ្រប់ជ្រុងជ្រោយ និងឱ្យស្របទៅ​នឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

ឯកឧត្តមរដ្ឋលេខាធិការបានឱ្យដឹងទៀតថា​ សេចក្តីព្រាងនេះ​​ គ្រោងនឹងបញ្ចប់នៅក្នុងដើមខែមីនា ឆ្នាំ២០២៤ នាពេលខាងមុខនេះ ដើម្បីដាក់ជូនឯកឧត្តមរដ្ឋមន្ត្រី ពិនិត្យ សម្រេច និងចុះហត្ថលេខា៕