ឯកឧត្តម បណ្ឌិត អាន ពេជ្រ ហត្ថដា រដ្ឋលេខាធិការ ក្រសួងធនធានទឹក និងឧតុនិយម អញ្ជើញចូលរួមជាវាគ្មិនក្នុងសិក្ខាសាលាថ្នាក់ជាតិ ស្ដីពីចក្ខុវិស័យទឹកនៅកម្ពុជា
រាជធានីភ្នំពេញ, ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម បានអញ្ជើញចូលរួមជាវាគ្មិនក្នុងសិក្ខាសាលាថ្នាក់ជាតិស្តីពីចក្ខុវិស័យទឹកនៅកម្ពុជា ក្រោមប្រធានបទ «ការផ្តល់យោបល់អំពីចក្ខុវិស័យទឹកថ្នាក់ជាតិ សម្រាប់និរន្តរភាព និងវិបុលភាពរួមរវាងកម្ពុជា និងក្រុមប្រឹក្សាទឹកអាស៊ី ក្នុងយុគសម័យនៃវិបត្តិអាកាសធាតុ»។
សូមជម្រាបថា សិក្ខាសាលាដែលរៀបចំឡើងដោយរដ្ឋសភាកម្ពុជា ក្រុមប្រឹក្សាទឹកអាស៊ី និងវិទ្យាស្ថានចក្ខុវិស័យអាស៊ីនាពេលនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា តំណាងដ៏ខ្ពង់ខ្ពស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ដោយមានអ្នកចូលរួមមកពីក្រសួង-ស្ថាប័ន រាជធានី-ខេត្ត និងភាគីកូរ៉េ។
ឯកឧត្តមរដ្ឋលេខាធិការមានប្រសាសន៍ឱ្យដឹងថា ការរៀបចំសិក្ខាសាលានេះឡើងគឺក្នុងគោលបំណងបង្កើតរបៀបវារៈអភិវឌ្ឍន៍វិស័យទឹកសម្រាប់កម្ពុជាដែលជាប្រទេសសហប្រតិបត្តិការដ៏សំខាន់របស់កូរ៉េ កំណត់អាទិភាពសម្រាប់កិច្ចសហប្រតិបត្តិការរវាងប្រទេសទាំងពីរ និងតភ្ជាប់បង្កើតគម្រោងអភិវឌ្ឍន៍លើវិស័យទឹកនៅកម្ពុជា។
ទន្ទឹមនឹងនេះ ឯកឧត្តមរដ្ឋលេខាធិការបន្តឱ្យដឹងថា តាមរយៈសិក្ខាសាលានេះ កម្ពុជានិងភាគីកូរ៉េ ក៏បានពិភាក្សាផ្លាស់ប្តូរយោបល់ និងបទពិសោធន៍អំពីស្ថានភាពជាក់ស្តែង និងចក្ខុវិស័យនៃវិស័យធនធានទឹកនៅកម្ពុជានិងកូរ៉េ ហើយក៏នឹងឈ្វេងយល់បន្ថែមអំពីបញ្ហាប្រឈមនិងកាលានុវត្តភាព ដើម្បីជំរុញការអនុវត្តគម្រោងពាក់ព័ន្ធនឹងវិស័យទឹកទៅតាមស្ថានភាពតម្រូវការជាក់ស្តែង។
ឯកឧត្តមរដ្ឋលេខាធិការបញ្ជាក់ថា លទ្ធផលនៃសិក្ខាសាលានឹងក្លាយជាធាតុចូលសម្រាប់កិច្ចប្រជុំនៃ AAWC នៅក្នុងឱកាសនៃវេទិកាទឹកពិភពលោកលើកទី១០ នៅប្រទេសឥណ្ឌូនេស៊ី នាខែឧសភា ឆ្នាំ២០២៤ និងក្នុងឱកាសនៃសប្តាហ៍ទឹកពិភពលោកលើកទី៣ នៅប្រទេសចិន នាខែកញ្ញា ឆ្នាំ២០២៤ ខាងមុខ៕