ភាសាខ្មែរ
សារពីឯកឧត្តមរដ្ឋមន្ត្រី
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម
កម្ពុជាត្រូវការបង្កេីតអាងទឹក ស្តារអាងទឹក និងពង្រីកសក្តានុពលប្រភពទឹកដែលមានស្រាប់ដេីម្បីបំពេញនូវការស្រោចស្រព
វិស័យកសិកម្មនិងបំពេញតម្រូវការសម្រាប់ការប្រើប្រាស់ទឹកស្អាត កាត់បន្ថយបាននូវគ្រោះទឹកជំនន់ និងគ្រោះរាំងស្ងួតជាអតិបរមា
ឯកឧត្តម ប៊ុន ហ៊ាន រដ្ឋលេខាធិការ ចុះពិនិត្យទីតាំងត្រៀមបោសសម្អាតមីន និងយុទ្ធភណ្ឌមិនទាន់ផ្ទុះ ក្នុងគម្រោងអភិវឌ្ឍន៍ធនធានទឹកស្ទឹងស្វាហាប់ ស្ថិតក្នុងភូមិសាស្ដ្រខេត្តកំពង់ស្ពឺ
ផុសថ្ងៃ: 13-03-2026 | អ្នកអាន: 10 |
Shareនាថ្ងៃសុក្រ ១០រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៣ ខែមីនា ឆ្នាំ២០២៦ ឯកឧត្តម ប៊ុន ហ៊ាន រដ្ឋលេខាធិការ និងជានាយកគម្រោង ក្នុងនាមតំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេស ចុះពិនិត្យទីតាំងជាក់ស្តែងដែលត្រូវអនុវត្តការងារបោសសម្អាតមីន យុទ្ធភណ្ឌមិនទាន់ផ្ទុះ និងកាកសំណល់សង្គ្រាម ក្នុងគម្រោងអភិវឌ្ឍន៍ធនធានទឹកស្ទឹងស្វាហាប់ ក្នុងភូមិសាស្ដ្រខេត្តកំពង់ស្ពឺ។
ក្នុងឱកាសនោះ ឯកឧត្តមរដ្ឋលេខាធិការ បានបញ្ជាក់ជូនក្រុមការងារនៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងយុទ្ធភណ្ឌមិនទាន់ផ្ទុះ (NPMEC) នូវទីតាំងគោលដៅអាទិភាពចំនួន ០៤ កន្លែង រួមមាន៖ ទី១) ទីតាំងធ្វើការ និងស្នាក់នៅរបស់ក្រុមបច្ចេកទេស និងកម្មករ ទី២) ទីតាំងដែលត្រូវយកថ្មមកកសាងទំនប់ ទី៣) ទីទីតាំងសាងសង់ទំនប់ និងសំណង់ការងារទឹក និងទី៤) ទីតាំងអាងស្តុកទឹក។ បន្ថែមលើសពីនេះ ឯកឧត្តមបានគូសបញ្ជាក់ថា បច្ចុប្បន្នគម្រោងស្ថិតក្នុងដំណាក់កាលជ្រើសរើសក្រុមហ៊ុនសាងសង់ ហើយរំពឹងថានឹងអាចបើកការដ្ឋានជាផ្លូវការនៅចុងខែមេសា ឆ្នាំ២០២៦ ខាងមុខនេះ។
សូមបញ្ជាក់ផងដែរថា គម្រោងអភិវឌ្ឍន៍ធនធានទឹកស្ទឹងស្វាហាប់ មានទីតាំងស្ថិតក្នុងឃុំចំការបុក ស្រុកភ្នំស្រួច ខេត្តកំពង់ស្ពឺ (ចម្ងាយប្រមាណ ១២០ គីឡូម៉ែត្រ ពីរាជធានីភ្នំពេញ)។ អាងទឹកស្ទឹងស្វាហាប់នេះ មានសមត្ថភាពស្តុកទឹកបានជាង ១៥៣ លានម៉ែត្រត្រីគុណ ដែលនឹងដើរតួនាទីយ៉ាងសំខាន់ក្នុងការកាត់បន្ថយគ្រោះទឹកជំនន់នៅផ្នែកខាងក្រោម ព្រមទាំងផ្គត់ផ្គង់ទឹកសម្រាប់វិស័យកសិកម្ម ឧស្សាហកម្ម ការចិញ្ចឹមសត្វ ការប្រើប្រាស់ជាប្រភពទឹកស្អាត និងបម្រើឱ្យគោលបំណងពហុវិស័យផ្សេងៗទៀតនៅក្នុងតំបន់ ក្រោយពេលការសាងសង់ត្រូវបានបញ្ចប់ជាស្ថាពរ៕
