ភាសាខ្មែរ
សារពីឯកឧត្តមរដ្ឋមន្ត្រី
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម
កម្ពុជាត្រូវការបង្កេីតអាងទឹក ស្តារអាងទឹក និងពង្រីកសក្តានុពលប្រភពទឹកដែលមានស្រាប់ដេីម្បីបំពេញនូវការស្រោចស្រព
វិស័យកសិកម្មនិងបំពេញតម្រូវការសម្រាប់ការប្រើប្រាស់ទឹកស្អាត កាត់បន្ថយបាននូវគ្រោះទឹកជំនន់ និងគ្រោះរាំងស្ងួតជាអតិបរមា
លោក ថាំង វីយុទ្ធដា ប្រធាននាយកដ្ឋានវិស្វកម្ម ចុះពិនិត្យវឌ្ឍនភាពការងារស្តារព្រែកកំពង់ជ្រៃក្រោម (ជំហាន១) ស្ថិតក្នុងភូមិសាស្ដ្រខេត្តស្វាយរៀង សម្រេចបានប្រមាណ ២៨%
ផុសថ្ងៃ: 26-04-2026 | អ្នកអាន: 22 |
Shareនាថ្ងៃអាទិត្យ ១០កើត ខែពិសាខ ឆ្នាំមមី អដ្ឋស័ក ព.ស. ២៥៦៩ ត្រូវនឹងថ្ងៃទី២៦ ខែមេសា ឆ្នាំ២០២៦ លោក ថាំង វីយុទ្ធដា ប្រធាននាយកដ្ឋានវិស្វកម្ម តំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំមន្ត្រីបច្ចេកទេស ចុះពិនិត្យវឌ្ឍនភាពការងារស្តារព្រែកកំពង់ជ្រៃក្រោម (ជំហាន១) ដែលមានទីតាំងស្ថិតក្នុងឃុំស្វាយធំ ស្រុកស្វាយជ្រំ ខេត្តស្វាយរៀង។
សូមជម្រាបថា គម្រោងស្តារព្រែកកំពង់ជ្រៃក្រោម (ជំហាន១) នេះ បានចាប់ផ្ដើមអនុវត្តតាំងពីថ្ងៃទី២៦ ខែកុម្ភៈ ឆ្នាំ២០២៦ ដោយផ្តោតលើការងារសំខាន់ៗចំនួនពីរ រួមមាន៖ ១. ការងារស្តារព្រែកកំពង់ជ្រៃក្រោម ប្រវែង ៥ ៥០០ ម៉ែត្រ។ ២. ការងារសាងសង់សំណង់សិល្បការ្យសរុបចំនួន ២៤ កន្លែង។ គិតមកទល់ពេលនេះ លទ្ធផលការងារសម្រេចបានប្រមាណ ២៨% ហើយ និងគ្រោងនឹងបញ្ចប់ការងារជាស្ថាពរនៅចុងខែមិថុនា ឆ្នាំ២០២៦ ខាងមុខនេះ។
ក្នុងឱកាសចុះពិនិត្យនោះ លោកប្រធាននាយកដ្ឋាន បានគូសបញ្ជាក់ថា ការងារស្តារព្រែកកំពង់ជ្រៃក្រោម (ជំហាន១) មានគោលបំណងសំខាន់ក្នុងការតភ្ជាប់ចរន្តទឹកពីអាងទឹកកំពង់ជ្រៃ ទៅកាន់ទន្លេព្រំដែនកម្ពុជា-វៀតណាម។ លើសពីនេះ ព្រែកនេះនឹងដើរតួជាប្រភពទឹកស្រោចស្រពដ៏សំខាន់សម្រាប់ផ្ទៃដីបង្កបង្កើនផលកសិកម្មសរុប រួមមាន៖ ស្រូវវស្សាចំនួន ១ ២០០ ហិកតា, ស្រូវប្រាំង ១ ៥០០ ហិកតា និងដំណាំរួមផ្សំ ១៥ ហិកតា។ គម្រោងនេះក៏នឹងផ្ដល់អត្ថប្រយោជន៍ដល់ការប្រើប្រាស់ទឹកប្រចាំថ្ងៃរបស់ប្រជាពលរដ្ឋប្រមាណ ១ ៦៩៨ គ្រួសារ ក្នុងឃុំចំនួន ២ នៃស្រុកស្វាយជ្រំ ខេត្តស្វាយរៀង និងស្រុកកំពង់ត្របែក ខេត្តព្រៃវែង ផងដែរ។
ជាមួយគ្នានេះដែរ លោកប្រធាននាយកដ្ឋានវិស្វកម្ម ក៏បានផ្តល់អនុសាសន៍ណែនាំដល់ប្រធានការដ្ឋាន និងក្រុមការងារបច្ចេកទេស ត្រូវយកចិត្តទុកដាក់ខ្ពស់លើការគ្រប់គ្រង និងប្រើប្រាស់គ្រឿងចក្រឱ្យមានប្រសិទ្ធភាពបំផុត ដើម្បីធានាបាននូវការសន្សំសំចៃ ក្នុងបរិបទដែលតម្លៃប្រេងឥន្ទនៈមានការប្រែប្រួលកើនឡើង។ ទន្ទឹមនឹងនោះ លោកបានសង្កត់ធ្ងន់ឱ្យក្រុមការងារត្រូវប្រកាន់ខ្ជាប់នូវបទដ្ឋានបច្ចេកទេសឱ្យបានហ្មត់ចត់បំផុត ស្របតាមនិក្ខេបបទរបស់គម្រោង ដើម្បីធានាបាននូវគុណភាពសំណង់រឹងមាំយូរអង្វែង និងជំរុញការងារឱ្យសម្រេចបានតាមផែនការដែលបានកំណត់ទុក៕
