លោកជំទាវអនុរដ្ឋលេខាធិការ បានមានប្រសាសន៍បញ្ជាក់ថា កិច្ចប្រជុំនាពេលនេះ មានគោលបំណងពិនិត្យវឌ្ឍនភាពការងារ និងបញ្ហាប្រឈមនានានៃការអនុវត្តគម្រោងក្នុងរយៈពេលជាងមួយឆ្នាំកន្លងមក បន្ទាប់ពីទទួលបានការអនុម័តហិរញ្ញប្បទានពីធនាគារអភិវឌ្ឍន៍អាស៊ី កាលពីខែធ្នូ ឆ្នាំ២០២៤។ លោកជំទាវបានឱ្យដឹងបន្ថែមថា បេសកកម្មរបស់ក្រុមការងារធនាគារអភិវឌ្ឍន៍អាស៊ី (ADB) និងធនាគារវិនិយោគហេដ្ឋារចនាសម្ព័ន្ធអាស៊ី (AIIB) នឹងប្រព្រឹត្តទៅក្នុងរយៈពេល ១៣ថ្ងៃ ចាប់ពីថ្ងៃទី៤ ដល់ថ្ងៃទី១៦ ខែឧសភា ឆ្នាំ២០២៦ ដោយក្នុងនោះក្រុមការងារនឹងចុះពិនិត្យទីតាំងអនុគម្រោងផ្ទាល់ក្នុងខេត្តពោធិ៍សាត់ ខេត្តបាត់ដំបង និងខេត្តប៉ៃលិន ដើម្បីសិក្សាស្វែងយល់ពីវឌ្ឍនភាពនៃការសិក្សាលើអនុគម្រោងទាំងនោះ។

 

ក្នុងឱកាសនោះ លោកជំទាវអនុរដ្ឋលេខាធិការ បានថ្លែងអំណរគុណចំពោះក្រសួងសេដ្ឋកិច្ច និងហិរញ្ញវត្ថុ ព្រមទាំងធនាគារ ADB និង AIIB ដែលបានគាំទ្រផ្នែកបច្ចេកទេស និងហិរញ្ញវត្ថុ ដល់គម្រោងគ្រប់គ្រងធនធានទឹកចម្រុះ (IWRM) ដើម្បីលើកកម្ពស់សន្តិសុខទឹក និងហេដ្ឋារចនាសម្ព័ន្ធធារាសាស្ត្រឱ្យមានប្រសិទ្ធភាព ឆ្លើយតបនឹងការប្រែប្រួលអាកាសធាតុ និងការធ្វើទំនើបកម្មកសិកម្ម។ គម្រោង IWRM នេះ ជាផ្នែកមួយនៃផែនការយុទ្ធសាស្ត្រអភិវឌ្ឍន៍វិស័យធនធានទឹក ៥ឆ្នាំ (២០២៤-២០២៨) របស់រាជរដ្ឋាភិបាលអាណត្តិទី៧ ដែលមានរយៈពេលអនុវត្ត ៧ឆ្នាំ (២០២៥-២០៣១) ក្នុងភូមិសាស្ត្រខេត្តពោធិ៍សាត់ និងខេត្តបាត់ដំបង សំដៅអភិវឌ្ឍវិស័យនេះឱ្យមានចីរភាព និងបរិយាបន្ន៕