ក្នុងកិច្ចប្រជុំនេះ ឯកឧត្តមរដ្ឋលេខាធិការប្រចាំការ បានលើកឡើងថា ក្រសួងសេដ្ឋកិច្ច និងហិរញ្ញវត្ថុ កំពុងសហការជាមួយធនាគារ ADB ដើម្បីរៀបចំផែនការមេសម្រាប់គម្រោងភាពជាដៃគូរវាងរដ្ឋ និងឯកជន (PPP Masterplan) ដែលក្នុងនោះ ក្រុមការងារនៃក្រសួងធនធានទឹក និងឧតុនិយម បានចូលរួមផ្តល់នូវធាតុចូលបច្ចេកទេសចាំបាច់នានា ដើម្បីធានាឱ្យការរៀបចំផែនការមេនេះមានលក្ខណៈគ្រប់ជ្រុងជ្រោយ និងឆ្លើយតបទៅនឹងតម្រូវការជាក់ស្តែង។

 

ទន្ទឹមនឹងនេះ ឯកឧត្តមរដ្ឋលេខាធិការប្រចាំការ ក៏បានគូសបញ្ជាក់ផងដែរថា ការអនុវត្តគម្រោង PPP លើការប្រតិបត្តិការ និងថែទាំប្រព័ន្ធធារាសាស្ត្រ គឺជាភារកិច្ចថ្មីដ៏សំខាន់ក្នុងអាណត្តិទី៧ នៃរដ្ឋសភា ដែលតម្រូវឱ្យមានការរៀបចំក្របខណ្ឌគោលនយោបាយ និងផែនការយុទ្ធសាស្ត្រដាច់ដោយឡែកសម្រាប់វិស័យធារាសាស្ត្រ។ ឯកឧត្តមបានសង្កត់ធ្ងន់លើសារៈសំខាន់នៃការផ្សព្វផ្សាយដល់ប្រជាកសិករ និងអ្នកពាក់ព័ន្ធឱ្យយល់ច្បាស់ពីអត្ថប្រយោជន៍នៃការចូលរួមវិនិយោគពីវិស័យឯកជន ដែលមិនត្រឹមតែជួយពង្រឹងប្រសិទ្ធភាព និងនិរន្តរភាពនៃប្រព័ន្ធធារាសាស្ត្រប៉ុណ្ណោះទេ ប៉ុន្តែថែមទាំងជួយកាត់បន្ថយបន្ទុកថវិកាជាតិបានមួយកម្រិតធំផងដែរ។ កិច្ចប្រជុំបានបញ្ចប់ទៅដោយជោគជ័យ ជាមួយការប្តេជ្ញាចិត្តខ្ពស់ក្នុងការជំរុញកិច្ចសហប្រតិបត្តិការនេះឱ្យសម្រេចបានតាមគោលដៅដែលបានគ្រោងទុក៕