ភាសាខ្មែរ
សារពីឯកឧត្តមរដ្ឋមន្ត្រី
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម
កម្ពុជាត្រូវការបង្កេីតអាងទឹក ស្តារអាងទឹក និងពង្រីកសក្តានុពលប្រភពទឹកដែលមានស្រាប់ដេីម្បីបំពេញនូវការស្រោចស្រព
វិស័យកសិកម្មនិងបំពេញតម្រូវការសម្រាប់ការប្រើប្រាស់ទឹកស្អាត កាត់បន្ថយបាននូវគ្រោះទឹកជំនន់ និងគ្រោះរាំងស្ងួតជាអតិបរមា
ឯកឧត្តម ចាន់ យុត្ថា រដ្ឋលេខាធិការ អញ្ជើញដឹកនាំកិច្ចប្រជុំជាមួយបងប្អូនប្រជាកសិករមូលដ្ឋាន ដើម្បីពិភាក្សាលើការចាប់ផ្តើមអនុវត្តគម្រោងប្រព័ន្ធធារាសាស្ត្រទំនប់ក្រាយ នៅភូមិសាស្ដ្រខេត្តកំពង់ធំ
ផុសថ្ងៃ: 28-02-2026 | អ្នកអាន: 18 |
Shareនារសៀលថ្ងៃទី២៧ ខែកុម្ភៈ ឆ្នាំ២០២៦ ឯកឧត្តម ចាន់ យុត្ថា រដ្ឋលេខាធិការ និងជានាយកគម្រោងកម្មវិធីគ្រប់គ្រងធនធានទឹក និងការផ្លាស់ប្តូរកសិកម្មនៅប្រទេសកម្ពុជា (WAT4CAM) ជំហានទី១ ក្នុងនាមតំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំជាមួយបងប្អូនប្រជាកសិករមូលដ្ឋាន ដើម្បីពិភាក្សាលើការចាប់ផ្តើមអនុវត្ត គម្រោងប្រព័ន្ធធារាសាស្ត្រទំនប់ក្រាយ ដែលគ្រោងនឹងបើកការដ្ឋានសាងសង់នាចុងខែមីនា ឆ្នាំ២០២៦ ខាងមុខនេះ ស្ថិតក្នុងភូមិសាស្ដ្រខេត្តកំពង់ធំ ។
កិច្ចប្រជុំនេះ ក៏មានការអញ្ជើញចូលរួមពីសំណាក់ លោកស្រី សេង សុធីរ៉ា តំណាងទីភ្នាក់ងារបារាំងសម្រាប់ការអភិវឌ្ឍ (AFD) តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងកសិកម្ម រុក្ខាប្រមាញ់ និងនេសាទ លោកអភិបាលស្រុកស្ទោង ព្រមទាំងអាជ្ញាធរឃុំ និងបងប្អូនប្រជាកសិករយ៉ាងច្រើនកុះករ នៅសាលាឃុំម្សាក្រង ស្រុកស្ទោង ខេត្តកំពង់ធំ។
ក្នុងឱកាសនោះ ឯកឧត្តមរដ្ឋលេខាធិការ បានគូសបញ្ជាក់ពីសាវតា និងគោលបំណងយុទ្ធសាស្ត្រនៃគម្រោង ដែលទទួលបានការគាំទ្រហិរញ្ញប្បទានពីទីភ្នាក់ងារ AFD ក្នុងគោលដៅធានាឱ្យបងប្អូនកសិករមានទឹកប្រើប្រាស់គ្រប់គ្រាន់សម្រាប់ការដាំដុះ កាត់បន្ថយការពឹងផ្អែកទាំងស្រុងលើទឹកភ្លៀង និងបង្កើនសមត្ថភាពផលិតស្រូវឱ្យបានពីរដងក្នុងមួយឆ្នាំ។ គម្រោងនេះ នឹងដើរតួនាទីយ៉ាងសំខាន់ក្នុងការកែលម្អផលិតភាពកសិកម្ម បង្កើនចំណូលគ្រួសារ និងលើកកម្ពស់កម្រិតជីវភាពរបស់ប្រជាពលរដ្ឋក្នុងស្រុកស្ទោងឱ្យកាន់តែប្រសើរឡើង។
ជាទីបញ្ចប់ ឯកឧត្តមបានអំពាវនាវដល់បងប្អូនប្រជាកសិករ មេត្តាផ្តល់កិច្ចសហការ និងការយោគយល់អធ្យាស្រ័យខ្ពស់ដល់ក្រុមការងារក្នុងអំឡុងពេលសាងសង់ ដើម្បីឱ្យដំណើរការការដ្ឋានប្រព្រឹត្តទៅដោយរលូន ប្រកបដោយប្រសិទ្ធភាព និងអាចផ្តល់អត្ថប្រយោជន៍យូរអង្វែងដល់សហគមន៍ទាំងមូល។
