សូមជម្រាបថា កិច្ចប្រជុំនាពេលនេះគឺដើម្បីពិនិត្យលើវឌ្ឍនភាព និងលទ្ធផលការងារសម្រេចបានក្នុងខែមីនា និងផែនការសកម្មភាពសម្រាប់ខែមេសា របស់ក្រសួងនីមួយៗ ដំណើរការលេខាធិការដ្ឋានក្រុមការងារត្រី-វិស័យ ក៏ដូចជាការត្រៀមរៀបចំកិច្ចប្រជុំត្រី-វិស័យថ្នាក់រដ្ឋមន្រ្តីលើកទី៦នាពេលខាងមុខ។

 

ឯកឧត្តមរដ្ឋលេខាធិការ បានបញ្ជាក់ឱ្យដឹងថា កិច្ចប្រជុំបានពិនិត្យ និងពិភាក្សាលើវឌ្ឍនភាពបណ្តាសហគមន៍ដែលបាន និងកំពុងអនុវត្តន៍កិច្ចអន្តរាគមន៍ត្រី-វិស័យនៅឆ្នាំ២០២៦ និងវឌ្ឍនភាពនៃការរៀបចំយុទ្ធសាស្ត្រ និងផែនការអនុវត្តន៍ សម្រាប់ការអភិវឌ្ឍន៍ប្រកបដោយការសម្របសម្រួលលើវិស័យកសិកម្ម ទឹក និងអភិវឌ្ឍន៍ជនបទនៅកម្ពុជា ឆ្នាំ២០២៧-២០៣១។ ឯកឧត្តមរដ្ឋលេខាធិការ បានបន្ថែមថា កិច្ចប្រជុំក៏បានពិនិត្យ និងពិភាក្សាលើសេចក្តីព្រាងរបៀបវារៈ ព្រមទាំងវីដេអូឃ្លីបស្តីពីសមិទ្ធផលនៅតាមបណ្តាសហគមន៍ដែលទទួលបានកិច្ចអន្តរាគមន៍ត្រី-វិស័យ និងបានពិភាក្សាលើសកម្មភាពត្រូវអនុវត្តបន្តសម្រាប់ការរៀបចំកិច្ចប្រជុំត្រី-វិស័យថ្នាក់រដ្ឋមន្រ្តីលើកទី៦ ដែលនឹងប្រព្រឹត្តទៅនៅចុងខែមេសា ឆ្នាំ២០២៦៕