កិច្ចប្រជុំនេះ មានការអញ្ជើញចូលរួមពី ឯកឧត្តម ខុន សេរីរដ្ឋា អភិបាលរងនៃគណៈអភិបាលខេត្តកណ្តាល តំណាងក្រសួងរ៉ែ និងថាមពល ក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន ក្រសួងសាធារណការ និងដឹកជញ្ជូន លោក លោកស្រី ជាតំណាងមកពីគ្រប់ស្រុក-ឃុំ ព្រមទាំងថ្នាក់ដឹកនាំ មន្ត្រីបច្ចេកទេសនៃមន្ទីរធនធានទឹក និងឧតុនិយម មន្ទីររ៉ែ និងថាមពល ចំណុះឱ្យរដ្ឋបាលខេត្តកណ្តាល និងតំណាងក្រុមហ៊ុនទទួលបានអាជ្ញាបណ្ណធ្វើអាជីវកម្មខ្សាច់ជាច្រើនរូប។

 

មានប្រសាសន៍ក្នុងឱកាសនោះ ឯកឧត្តមរដ្ឋលេខាធិការ បានបញ្ជាក់ឱ្យដឹងថា កិច្ចប្រជុំផ្សព្វផ្សាយនេះ ត្រូវបានរៀបចំឡើងក្នុងគោលបំណងពង្រឹងការយល់ដឹង ដោយផ្តោតសំខាន់លើទិដ្ឋភាពសេដ្ឋកិច្ច-សង្គម និងបរិស្ថាន ជូនដល់បណ្តាស្ថាប័ន អង្គភាពពាក់ព័ន្ធ និងរដ្ឋបាលថ្នាក់ក្រោមជាតិ ដែលបំពេញការងារទាក់ទងនឹងការគ្រប់គ្រងធនធានខ្សាច់។ ទន្ទឹមនឹងនេះ កិច្ចប្រជុំក៏មានគោលដៅពង្រឹងកិច្ចសហការ ដោយជំរុញឱ្យបណ្តាក្រុមហ៊ុន-សហគ្រាស ដែលប្រកបអាជីវកម្មខ្សាច់ ចូលរួមសហការគ្នា និងបង្កើនការទទួលខុសត្រូវខ្ពស់ ព្រមទាំងធានាឱ្យបាននូវនិរន្តរភាព តាមរយៈការអនុវត្តអាជីវកម្មខ្សាច់ឱ្យបានត្រឹមត្រូវតាមបទដ្ឋានបច្ចេកទេស ច្បាប់អនុញ្ញាត និងរួមគ្នាកាត់បន្ថយសកម្មភាពអាជីវកម្មខ្សាច់អនាធិបតេយ្យ ឱ្យមកនៅកម្រិតអប្បបរមាផងដែរ។

 

ជាទីបញ្ចប់ ឯកឧត្តមរដ្ឋលេខាធិការ បានផ្តល់អនុសាសន៍ណែនាំ និងក្រើនរំលឹកដល់បណ្តាស្ថាប័ន អង្គភាពពាក់ព័ន្ធថ្នាក់ក្រោមជាតិ និងបណ្តាក្រុមហ៊ុន-សហគ្រាសប្រកបអាជីវកម្មខ្សាច់ទាំងអស់ ត្រូវរួមគ្នាលើកកម្ពស់ការអនុវត្តលក្ខណៈបច្ចេកទេសឱ្យបានគ្រប់ជ្រុងជ្រោយ ដើម្បីធានាបាននូវការធ្វើអាជីវកម្មប្រកបដោយប្រសិទ្ធភាពខ្ពស់ ប្រសិទ្ធផល និងធានាបាននូវនិរន្តរភាពបរិស្ថាន និងសង្គមជាតិទាំងមូល៕