សូមជម្រាបថា ពិធីនេះមានការអញ្ជើញចូលរួមពី លោក Lu Qizhi នាយកកុងស៊ុលចិនប្រចាំខេត្តសៀមរាប និងជាតំណាងស្ថានទូតចិនប្រចាំកម្ពុជា, លោក ឃ្លោក សំអាង ប្រធាននាយកដ្ឋានផែនការ និងសហប្រតិបត្តិការអន្តរជាតិ និងជានាយកគម្រោង, មន្ត្រីតំណាងក្រសួងការបរទេស និងសហប្រតិបត្តិការអន្តរជាតិ និងគណៈកម្មាធិការជាតិទន្លេមេគង្គកម្ពុជា ព្រមទាំងមន្ត្រីជំនាញនៃនាយកដ្ឋានពាក់ព័ន្ធក្រោមឱវាទក្រសួង រួមនឹងមន្ត្រីតំណាងមន្ទីរធនធានទឹក និងឧតុនិយម នៃរាជធានី-ខេត្តគោលដៅ សរុបប្រមាណ ៥០រូប។

ថ្លែងក្នុងឱកាសនោះ ឯកឧត្តមអគ្គនាយក បានលើកឡើងថា សិក្ខាសាលាផ្សព្វផ្សាយនាពេលនេះ គឺធ្វើឡើងក្នុងគោលបំណងបង្ហាញពីលទ្ធផលនៃការអនុវត្តគម្រោងស្តីពីការធ្វើបច្ចុប្បន្នភាព និងចែករំលែកព័ត៌មានអំពីធនធានទឹករវាងប្រទេសក្នុងតំបន់ទន្លេមេគង្គ-ឡានឆាង។ ជាមួយគ្នានេះ គម្រោងដ៏មានសារៈសំខាន់នេះ ទទួលបានការឧបត្ថម្ភគាំទ្រថវិកាពីរដ្ឋាភិបាលនៃសាធារណរដ្ឋប្រជាមានិតចិន តាមរយៈមូលនិធិពិសេសមេគង្គ-ឡានឆាង (LMC Special Fund) ក្រោមក្របខ័ណ្ឌនៃកិច្ចសហប្រតិបត្តិការមេគង្គ-ឡានឆាង រួមទាំងមានការសម្របសម្រួល និងជ្រោមជ្រែងយ៉ាងសកម្មពីក្រសួងការបរទេស និងសហប្រតិបត្តិការអន្តរជាតិ ដើម្បីជំរុញឱ្យដំណើរការអនុវត្តគម្រោងសម្រេចបានលទ្ធផលជោគជ័យតាមការរំពឹងទុក៕