​ក្នុងឱកាសនោះ លោកប្រធានបានបញ្ជាក់ថា វគ្គបណ្តុះបណ្តាលនេះមានគោលបំណងសំខាន់ក្នុងការផ្សព្វផ្សាយ និងចែករំលែកចំណេះដឹងអំពីបច្ចេកទេសនៃប្រតិបត្តិការ និងការថែទាំហេដ្ឋារចនាសម្ព័ន្ធធារាសាស្ត្រឱ្យមានប្រសិទ្ធភាពខ្ពស់ និងប្រកបដោយនិរន្តរភាព។ ទន្ទឹមនឹងនោះ អង្គពិធីក៏បានពិភាក្សាលើការរៀបចំផែនការថវិកាសម្រាប់ការងារជួសជុល និងថែទាំនាពេលអនាគត ដើម្បីធានាបាននូវភាពយូរអង្វែងនៃហេដ្ឋារចនាសម្ព័ន្ធទាំងនោះ។ បន្ថែមលើនេះ លោកប្រធានក៏បានផ្ដាំផ្ញើដល់សិក្ខាកាមទាំងអស់ ឱ្យខិតខំត្រងត្រាប់ស្តាប់ សាកសួរដេញដោលជាមួយគ្រូឧទ្ទេស និងពិភាក្សាគ្នាឱ្យបានផុលផុស ដើម្បីក្រេបជញ្ជក់យកចំណេះដឹង និងបទពិសោធន៍ សម្រាប់យកទៅអនុវត្តជាក់ស្តែងក្នុងសហគមន៍ឱ្យទទួលបានលទ្ធផលល្អប្រសើរ។

 

​គួរជម្រាបថា គម្រោងនេះមានសមាសភាគសំខាន់ៗចំនួន ៣ រួមមាន៖ ១. ការសាងសង់ទំនប់នៅភូមិត្រាំកាច់ ប្រវែង ៣២៥ ម៉ែត្រ រួមជាមួយសំណង់បង្ហៀរ ១ កន្លែង សំណង់បញ្ចេញទឹក ១ កន្លែង និងប្រព័ន្ធទុយោមេប្រវែង ២ ៤៣០ ម៉ែត្រ។ ២. ការសាងសង់ទំនប់នៅភូមិក្រង់តេះ ប្រវែង ៧៧ ម៉ែត្រ រួមជាមួយសំណង់បង្ហៀរ ១ កន្លែង និងសំណង់បញ្ចេញទឹក ១ កន្លែង។ ៣. ការសាងសង់សំណង់ស្ទាក់ទឹកអូរទេរ ១ កន្លែង ដែលមានទ្វារទឹក ៥ សន្លឹក ដើម្បីបម្រើដល់ការស្រោចស្រពក្នុងវិស័យកសិកម្មនៅក្នុងសហគមន៍កសិកម្មអភិវឌ្ឍន៍ក្រង់តេះ ឱ្យកាន់តែមានលក្ខណៈទំនើប សន្សំសំចៃ និងមានប្រសិទ្ធភាពខ្ពស់៕