សូមជម្រាបថា វេទិកានេះត្រូវបានរៀបចំឡើងក្រោមការគាំទ្រពីក្រសួងសេដ្ឋកិច្ច និងហិរញ្ញវត្ថុ ក្នុងគោលបំណងបញ្ជ្រាបការយល់ដឹង និងផ្សព្វផ្សាយជាសាធារណៈជូនដល់សាធារណជន អ្នកសិក្សាស្រាវជ្រាវ ដៃគូអភិវឌ្ឍន៍ អង្គការមិនមែនរដ្ឋាភិបាល និងភាគីពាក់ព័ន្ធទាំងអស់ អំពីទំហំថវិកាប្រចាំឆ្នាំ សេវាសាធារណៈ វឌ្ឍនភាពការងារ និងទិសដៅយុទ្ធសាស្ត្រឆ្នាំ២០២៦ របស់ក្រសួង ដើម្បីឆ្លើយតបទៅនឹងតម្រូវការជាក់ស្ដែង និងបម្រើឧត្ដមប្រយោជន៍ជូនប្រជាពលរដ្ឋឱ្យកាន់តែមានប្រសិទ្ធភាព។

 

ក្នុងឱកាសនោះ ឯកឧត្តមរដ្ឋលេខាធិការ បានគូសបញ្ជាក់ថា ដើម្បីបង្កើនប្រសិទ្ធភាពក្នុងការគ្រប់គ្រងធនធានទឹក ក្រសួងបានដាក់ចេញនូវផែនការសកម្មភាព និងគោលនយោបាយអាទិភាពសំខាន់ៗ រួមមាន៖ ទី១. បន្តជំរុញការធ្វើទំនើបកម្មប្រព័ន្ធធារាសាស្ត្រ និងហេដ្ឋារចនាសម្ព័ន្ធទឹក, ទី២. បន្តស្ដារ ជួសជុល និងថែទាំប្រព័ន្ធធារាសាស្ត្រជាប្រចាំ, ទី៣. ជំរុញការលើកទឹកចិត្តឱ្យកសិករចូលរួមក្នុងសហគមន៍ប្រើប្រាស់ទឹកនៅតាមមូលដ្ឋាន, ទី៤. ពង្រឹងវិធានការការពារ និងអភិរក្សធនធានទឹក, ទី៥. បន្តធ្វើទំនើបកម្មប្រព័ន្ធព័ត៌មានធាតុអាកាស និងការព្យាករឱ្យបានមុនហេតុការណ៍ និងទី៦. យកចិត្តទុកដាក់លើសុខភាពទន្លេ តាមរយៈការសាងសង់ច្រាំងទន្លេ ការគ្រប់គ្រងលំហូរ និងគុណភាពទឹកឱ្យបានល្អប្រសើរ។

 

ក្នុងវេទិកានេះ ក៏មានការអញ្ជើញចូលរួមពីថ្នាក់ដឹកនាំក្រសួង តំណាងអាជ្ញាធរទន្លេសាប គណៈកម្មាធិការជាតិទន្លេមេគង្គកម្ពុជា ថ្នាក់ដឹកនាំអង្គភាពក្រោមឱវាទក្រសួង និងប្រធានមន្ទីររាជធានី-ខេត្តទាំង ២៥ រួមជាមួយតំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងដៃគូអភិវឌ្ឍន៍អន្តរជាតិ (AFD, ADB, World Bank, IMF និង JICA) ជាច្រើនរូបទៀត៕