សូមជម្រាបថា គម្រោងអាទិភាពទាំង ០៧ ដែលត្រូវបានលើកយកមកពិភាក្សា រួមមាន៖ ទី១. ការសាងសង់សំណង់ប្រឡាយមេលេខ៩០ និងសំណង់សិល្បការ្យ ក្នុងស្រុកកោះអណ្តែត ខេត្តតាកែវ ទី២. ការស្តារប្រឡាយស្វាយមាស និងសំណង់សិល្បការ្យ ក្នុងស្រុកជើងព្រៃ និងស្រុកព្រៃឈរ ខេត្តកំពង់ចាម ទី៣. ការស្តារប្រឡាយតាហោ និងសំណង់សិល្បការ្យ (ជំហាន២) ក្នុងស្រុកបារាយណ៍ ខេត្តកំពង់ធំ ទី៤. ការស្តារប្រឡាយរងបន្ទាយស្ទោង ក្នុងស្រុកស្ទោង ខេត្តកំពង់ធំ ទី៥. ការស្តារប្រឡាយមេអន្សងនៀវ និងសំណង់សិល្បការ្យ ក្នុងស្រុកភ្នំស្រុក ខេត្តបន្ទាយមានជ័យ ព្រមទាំងគម្រោងការពារច្រាំងទន្លេមេគង្គ (ជំហានទី១) ចំនួន ០២ទីតាំង រួមមាន៖ នៅស្រុកក្រូចឆ្មារ ខេត្តត្បូងឃ្មុំ ប្រវែង ៤២០ម៉ែត្រ និងនៅស្រុកកោះសូទិន ខេត្តកំពង់ចាម ប្រវែង ៦០០ម៉ែត្រ។

 

ថ្លែងក្នុងអង្គប្រជុំ ឯកឧត្តមរដ្ឋលេខាធិការ បានសង្កត់ធ្ងន់ថា ការពិនិត្យ និងវាយតម្លៃនាពេលនេះ គឺដើម្បីធានានូវភាពត្រឹមត្រូវ គណនេយ្យភាព និងតម្លាភាព ដោយផ្អែកលើបទដ្ឋានបច្ចេកទេស និងតម្លៃទីផ្សារជាក់ស្តែង។ ទន្ទឹមនឹងនេះ អង្គប្រជុំបានផ្ដោតការយកចិត្តទុកដាក់ខ្ពស់លើគុណភាព និងនិរន្តរភាពសំណង់ ដោយគិតគូរយ៉ាងល្អិតល្អន់ពីឥទ្ធិពលនៃសន្ទស្សន៍តម្លៃប្រេងសកល ដើម្បីធានាប្រសិទ្ធភាពការងារ និងឆ្លើយតបបានទាន់ពេលវេលាទៅនឹងតម្រូវការប្រើប្រាស់ទឹករបស់ប្រជាពលរដ្ឋ សំដៅលើកកម្ពស់សេដ្ឋកិច្ចគ្រួសារ និងសង្គមជាតិទាំងមូល។