ភាសាខ្មែរ
សារពីឯកឧត្តមរដ្ឋមន្ត្រី
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម
កម្ពុជាត្រូវការបង្កេីតអាងទឹក ស្តារអាងទឹក និងពង្រីកសក្តានុពលប្រភពទឹកដែលមានស្រាប់ដេីម្បីបំពេញនូវការស្រោចស្រព
វិស័យកសិកម្មនិងបំពេញតម្រូវការសម្រាប់ការប្រើប្រាស់ទឹកស្អាត កាត់បន្ថយបាននូវគ្រោះទឹកជំនន់ និងគ្រោះរាំងស្ងួតជាអតិបរមា
ឯកឧត្តម ឈុន ពុទ្ធារិទ្ធ អគ្គនាយកបច្ចេកទេស អញ្ជើញចុះពិនិត្យវឌ្ឍនភាពការងារសាងសង់ការពារច្រាំងទន្លេបាសាក់ ក្នុងភូមិសាស្ត្រក្រុងសំពៅពូន ខេត្តកណ្តាល សម្រេចបានប្រមាណ ៥០%
ផុសថ្ងៃ: 29-04-2026 | អ្នកអាន: 12 |
Shareនៅថ្ងៃពុធ ១៣កើត ខែពិសាខ ឆ្នាំមមី អដ្ឋស័ក ពុទ្ធសករាជ ២៥៦៩ ត្រូវនឹងថ្ងៃទី២៩ ខែមេសា ឆ្នាំ២០២៦ ឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេស និងជាប្រធានអង្គភាពត្រួតពិនិត្យគម្រោង តំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេស អមដំណើរដោយមន្ត្រីជំនាញនៃនាយកដ្ឋានជលសាស្ត្រ និងការងារទន្លេ ចុះត្រួតពិនិត្យ និងវាយតម្លៃវឌ្ឍនភាពការងារនៃគម្រោងការពារច្រាំងទន្លេបាសាក់ ស្ថិតក្នុងភូមិសាស្ត្រសង្កាត់ព្រែកជ្រៃ ក្រុងសំពៅពូន ខេត្តកណ្តាល។
ក្នុងឱកាសបេសកកម្មនេះ ឯកឧត្តមអគ្គនាយក បានបញ្ជាក់ថា គម្រោងការពារច្រាំងទន្លេបាសាក់ដែលមានប្រវែងសរុប ៥០០ ម៉ែត្រ កំពុងអនុវត្តដោយប្រើប្រាស់បច្ចេកទេសចម្រុះ រួមមាន៖ ការរៀបក្រណាត់បាវ Geotextile ច្រកខ្សាច់ ការរៀបប្រអប់ថ្ម (Gabion boxes) ដើម្បីទប់ដី និងការងារចាក់បេតុងក្រវ៉ាត់ធ្នឹមការពារជើងទេរយ៉ាងរឹងមាំ ដែលគិតមកដល់ពេលនេះ លទ្ធផលការងារសម្រេចបានប្រមាណ ៥០% ហើយ។
ក្នុងឱកាសនោះ ឯកឧត្តមអគ្គនាយក បានកោតសរសើរចំពោះលទ្ធផលការងារដែលសម្រេចបាន និងបានណែនាំឱ្យក្រុមការងារបច្ចេកទេសបន្តយកចិត្តទុកដាក់ខ្ពស់លើគុណភាពសំណង់តាមបទដ្ឋានស្តង់ដារ។ បន្ថែមលើនេះ ឯកឧត្តមបានជំរុញឱ្យបង្កើនសន្ទុះការងារដើម្បីបញ្ចប់តាមផែនការដែលបានគ្រោងទុក សំដៅឆ្លើយតបទៅនឹងការកាត់បន្ថយការបាក់ច្រាំងទន្លេជូនប្រជាពលរដ្ឋឱ្យមានប្រសិទ្ធភាពខ្ពស់បំផុត៕
