ក្នុងឱកាសនោះ ឯកឧត្ដមរដ្ឋលេខាធិការប្រចាំការ បានថ្លែងនូវការស្វាគមន៍យ៉ាងកក់ក្ដៅចំពោះគណៈប្រតិភូអង្គការ WMO និងបានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អប្រសើរ ក្នុងការចូលរួមចំណែកអភិវឌ្ឍន៍ប្រទេសកម្ពុជា ជាពិសេសលើវិស័យឧតុនិយម។ ជាមួយគ្នានេះ ឯកឧត្តមរដ្ឋលេខាធិការប្រចាំការ បានជម្រាបជូនគណៈប្រតិភូអំពីអាទិភាពការងាររបស់ក្រសួងធនធានទឹក និងឧតុនិយម ក្នុងនាមជាសេនាធិការជូនរាជរដ្ឋាភិបាល លើការងារព្យាករធាតុអាកាស និងអាកាសធាតុប្រចាំថ្ងៃ តាមរដូវកាល និងការផ្ដល់ព័ត៌មានព្រមានជាមុនអំពីគ្រោះមហន្តរាយធម្មជាតិនានា បង្កឡើងដោយការប្រែប្រួលអាកាសធាតុ ដើម្បីឱ្យសាធារណជនបានជ្រាប និងត្រៀមលក្ខណៈទប់ទល់បានទាន់ពេលវេលា។

 

ជាការឆ្លើយតប លោក Jason Watkins បានថ្លែងអំណរគុណ និងកោតសរសើរចំពោះក្រសួងធនធានទឹក និងឧតុនិយម ដែលតែងតែផ្ដល់កិច្ចសហការយ៉ាងស្អិតល្មួត និងគាំទ្រដល់បេសកកម្មរបស់អង្គការ WMO នៅកម្ពុជា។ជាមួយគ្នានេះ លោក ក៏បានជម្រាបជូនអំពីគោលបំណង និងវឌ្ឍនភាពនៃការអនុវត្តគម្រោង CREWS 2.0 ដែលកំពុងដំណើរការនៅព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ។ គម្រោងនេះផ្ដោតសំខាន់លើការងារព្យាករទឹកជំនន់ និងការកសាងសមត្ថភាពធនធានមនុស្ស តាមរយៈការប្រើប្រាស់ឧបករណ៍បច្ចេកវិទ្យាទំនើបៗ ដើម្បីបង្កើនប្រសិទ្ធភាពក្នុងការព្យាករគ្រោះមហន្តរាយផងដែរ៕