ថ្លែងក្នុងឱកាសនោះ ឯកឧត្តមអគ្គនាយក បានគូសបញ្ជាក់ថា វគ្គបណ្តុះបណ្តាលនេះមានសារៈសំខាន់ ក្នុងការពង្រឹងសមត្ថភាពមន្ត្រីបច្ចេកទេស វិស្វករប្រព័ន្ធធារាសាស្ត្រ និងកសិករ លើការគ្រប់គ្រង និងការប្រើប្រាស់ទឹកប្រកបដោយប្រសិទ្ធភាពសម្រាប់វិស័យកសិកម្ម រួមមាន៖ ទី១) បង្កើនចំណេះដឹងអំពីតម្រូវការទឹករបស់ដំណាំស្រូវតាមដំណាក់កាលលូតលាស់ និងការប្រើប្រាស់ទឹកប្រកបដោយប្រសិទ្ធភាព ដើម្បីកាត់បន្ថយការខ្ជះខ្ជាយ ទី២) លើកកម្ពស់គុណភាព និងបរិមាណទិន្នផលកសិផល ទី៣) ពង្រឹងសមត្ថភាពបច្ចេកទេសក្នុងការរៀបចំកាលវិភាគស្រោចស្រព និងការគណនាតម្រូវការទឹកឱ្យបានត្រឹមត្រូវ ទី៤) គាំទ្រការងារទប់ទល់នឹងការប្រែប្រួលអាកាសធាតុ និងការគ្រប់គ្រងទឹកក្នុងរដូវរាំងស្ងួត និតទី៥) និងការបែងចែកទឹកឱ្យបានសមស្រប លើកកម្ពស់កិច្ចសហការនិងការចែករំលែកបទពិសោធន៍រវាងមន្ត្រីបច្ចេកទេស និងស្ថាប័នពាក់ព័ន្ធ។

 

ក្នុងឱកាសនោះ ឯកឧត្តមអគ្គនាយក បានសម្តែងនូវជំនឿយ៉ាងមុតមាំថា វគ្គបណ្តុះបណ្តាលនេះនឹងផ្តល់ជូនសិក្ខាកាមនូវចំណេះដឹង និងបទពិសោធន៍ថ្មីៗ ដើម្បីជាមូលដ្ឋានគ្រឹះសម្រាប់យកទៅអនុវត្ត និងបណ្តុះបណ្តាលបន្តនៅតាមអង្គភាពរៀងៗខ្លួន។ ទន្ទឹមនឹងនេះ ឯកឧត្តមបានផ្តាំផ្ញើដល់សិក្ខាកាមទាំងអស់ឱ្យខិតខំយកចិត្តទុកដាក់ត្រងត្រាប់ស្តាប់គ្រូឧទ្ទេស ដើម្បីក្រេបជញ្ជក់ចំណេះដឹងឱ្យអស់លទ្ធភាព សំដៅពង្រឹងសមត្ថភាពផ្ទាល់ខ្លួន និងរួមចំណែកលើកកម្ពស់ប្រសិទ្ធភាពការងារឱ្យកាន់តែរលូន និងទទួលបានលទ្ធផលជោគជ័យ៕