ក្នុងឱកាសនៃបេសកកម្មនេះ ឯកឧត្តមអគ្គនាយក និងក្រុមការងារ បានអញ្ជើញចុះពិនិត្យវឌ្ឍនភាពគម្រោងការងារសំខាន់ៗចំនួន ២ កន្លែង រួមមាន៖

១. គម្រោងស្តារប្រព័ន្ធអាងទឹកអូរតាកេរ្តិ៍ (ជំហានទី ២)៖ ស្ថិតនៅឃុំស្ដើងជ័យ ស្រុកជើងព្រៃ។ ទំហំការងារសំខាន់ៗរួមមាន៖ ការស្តារប្រព័ន្ធអាងទឹក ១ ខ្សែ ប្រវែង ១ ៣០០ ម៉ែត្រ និងការសាងសង់សំណង់លូដោះទឹក (ទ្វារ ១) ចំនួន ៤ កន្លែង។ គិតមកទល់ពេលនេះ លទ្ធផលការងារសម្រេចបានប្រមាណ ៥០%។ ក្រោយពេលបញ្ចប់គម្រោង នឹងក្លាយជាប្រភពទឹកស្រោចស្រពយ៉ាងសំខាន់សម្រាប់ផ្ទៃដីស្រូវវស្សា ១ ៦០០ ហិកតា ស្រូវប្រាំង ៣៥០ ហិកតា និងដំណាំរួមផ្សំ ៧៨ ហិកតា ព្រមទាំងផ្តល់អត្ថប្រយោជន៍ដល់ការប្រើប្រាស់ទឹកប្រចាំថ្ងៃរបស់ប្រជាកសិករប្រមាណ ៩៣៧ គ្រួសារ ក្នុងភូមិខ្នារ និងភូមិដំណាក់អំពិល នៃឃុំស្ដើងជ័យ។

 

២. គម្រោងស្តារប្រឡាយស្វាយមាស៖ ស្ថិតនៅឃុំសំពងជ័យ ស្រុកជើងព្រៃ និងឃុំបឹងណាយ ស្រុកព្រៃឈរ។ ទំហំការងារសំខាន់ៗរួមមាន៖ ការស្តារប្រឡាយ ១ ខ្សែ ប្រវែង ៤ ៣៦០ ម៉ែត្រ និងការសាងសង់សំណង់សិល្បការ្យសរុបចំនួន ១២ កន្លែង ដែលក្នុងនោះរួមមាន៖ សំណង់ទទួលទឹក (ទ្វារ ២) ១ កន្លែង, សំណង់លូដោះទឹក (មុខកាត់ ៨០ ស.ម) ៦ កន្លែង, សំណង់លូចម្លង ១ កន្លែង, សំណង់ស្ទាក់ទឹក (ទ្វារ ២) ៣ កន្លែង និងសំណង់ស្ទាក់ទឹក (ទ្វារ ៣) ១ កន្លែង។ បច្ចុប្បន្ន លទ្ធផលការងារសម្រេចបានប្រមាណ ៥៥%។ ក្រោយពេលបញ្ចប់គម្រោង នឹងក្លាយជាប្រភពទឹកស្រោចស្រពយ៉ាងសំខាន់សម្រាប់ផ្ទៃដីស្រូវវស្សា ៦៧៣ ហិកតា, ស្រូវប្រាំង ២៥៤ ហិកតា និងដំណាំរួមផ្សំ ២០ ហិកតា ព្រមទាំងផ្តល់អត្ថប្រយោជន៍ដល់ប្រជាកសិករប្រមាណ ១ ១៥៩ គ្រួសារ ក្នុងភូមិចំនួន ៥ នៃឃុំសំពងជ័យ និងឃុំបឹងណាយ។

 

ក្នុងឱកាសនោះ ឯកឧត្តមអគ្គនាយក បានថ្លែងនូវការកោតសរសើរ និងវាយតម្លៃខ្ពស់ចំពោះវឌ្ឍនភាពការងារដែលសម្រេចបាន។ ទន្ទឹមនឹងនេះ ឯកឧត្តមបានផ្តាំផ្ញើដល់ក្រុមការងារអនុវត្តគម្រោងនៃនាយកដ្ឋានវិស្វកម្ម ត្រូវយកចិត្តទុកដាក់ខ្ពស់លើការអនុវត្តការងារតាមបទដ្ឋានបច្ចេកទេសឱ្យបានហ្មត់ចត់ ដើម្បីធានាបាននូវសុវត្ថិភាព គុណភាព និងសោភ័ណភាព ហើយត្រូវជំរុញការអនុវត្តគម្រោងឱ្យសម្រេចបានតាមផែនការដែលបានគ្រោងទុក ប្រកបដោយប្រសិទ្ធភាព និងនិរន្តរភាព៕